Иртнине манмалăх вăхăт пур пек –

вăрçă чарăнни миçемĕш çул!

Чун суранĕ тӱрленмест-ха пурпĕр,

халĕ те юхать вĕри куççуль...

Кӑҫалхи ҫулталӑкӑн тӗп пулӑмӗ – Тӑван ҫӗршывӑн Аслӑ вӑрҫи Ҫӗнтерӳпе вӗçленнӗренпе 80 ҫул ҫитни. Раҫҫей Президенчӗ 2025-мӗш çула Тӑван çӗршыв хӳтӗлевçин çулталӑкӗ тесе пӗлтернӗ. Республикӑра вара ҫулталӑка Ҫӗнтерӳпе патриотлӑха халалланӑ.

Алманчӑ ялӗнчи культура çурчӗсенче ӗçлекенсем çак пулӑмсене халаласа, çĕршыв хÿтĕлевçисен пархатарлă ĕçне хаклас, вĕсене пулăшас, паттăрлăхне ĕмĕрлĕхех историе кĕртсе хăварас тĕлĕшпе уяв каҫӗ йӗркелерӗç.

Уява хутшăнса, Алманчӑ территори пай пуҫлӑхӗ Владимир Киргизов, Патӑрьел муниципалитетӗнчи депутатсен пухӑвӗн депутачӗ Александр Петров тухса калаҫрӗҫ, пурне те тăнăҫ пурнăҫпа сенкер тÿпе сунчӗç.

Вăрçă, патриотизм темипе ҫыхăннă, чуна хускатакан юрă-сăвă пулчӗ программăра. Экран çинчен Тăван çĕршывăн Аслă вăрçине, Афганистан, Кавказ тăрăхӗнчи, Сиринчи хирӗçӳсене хутшăннă, Украина таврашӗнчи паянхи кунччен пыракан ятарлă çар операци участникӗсен санӗсем пӗрин хыҫҫăн тепри тухса ылмашрӗҫ. Сивĕ окопра тăшман çулне пӱлсе тăракан салтаксемпе танах Аслă Çĕнтерӱ патне çул хывнă, Улатăр хули патĕнче вăрман каснă, Сăр шывĕ хĕррипе тата Хусан хули направленийĕнче хӱтĕлев сооруженийĕсем тунă тыл ӗҫченӗсене те манса хăвармарӗҫ уява йӗркелекенсем.

Ветерансене асăнса лартнă палăксен историйӗпе, халăхсен хаюлăхӗпе ҫирӗплӗхӗ, тусӗмлӗхӗ ҫинчен куҫпа курма пултарчӗҫ уяв каҫне хутшăнакансем.

Паллах ӗнтӗ, пуҫ хунă паттăрсене пӗр минут шăп тăрса асăнчӗҫ...

Уяв каҫӗ пурте пӗрле «Çӗнтеру кунӗ» юрра юрланипе вӗҫленчӗ.