Аслăчеменсем  Александр Сорочайкин (Чăваш Сашши) сăвăç-ентеше аса илсе  ялти  вăтам шкулта  «Янăра, тăван сăмахăм!» поэзи каçӗ ирттерчӗç. Пуҫарса янӑ ӑмӑртӑва 40   ҫынна яхăн хутшӑнчӗ. Илемлӗ вулакансене,  ӳсӗмне кура,  4 ушкӑна пайланă. Шкул ачинчен пуçласа аслисем таранах хутшăнма  пултарчӗç.  Мероприяти  «Чемен» ыр кăмăллăх фончӗ пуçарнипе иртрӗ. Уява Людмила Ежова библиотекарь ертсе пычӗ.

Поэзи каçӗнче паллă поэтсен,  Патăрьел тăрăхӗнче çуралнă сăвăçсен хайлавӗсем янăрарӗç.  Сăвă çырас ăсталăх та пур ку тăрăхра пурăнакансен. Вӗсем хăйсем çырнă сăввисене туйăмпа вулама тăрăшрӗç. Асăннă ушкăнри илемлӗ вулакансене уйрăмах итлесе ларма кăмăллă пулчӗ. 

"....Конкурса чылай  ача хутшăнни  савăнтарчӗ. Чăваш тумтирне тăхăннă çамрăксем  çине пăхма татах та кăмăллă пулчӗ.   Хайлавӗсем чуна витереççĕ, чĕререн тухакан сăмахĕсем куççуль кăлараççĕ. Акă, чăвашлăх камсенче тапса тăрать, пирӗн малашлăх вӗсенче. Епле савăнчӗç паян вӗсем"- палăртрӗ  Николай Алешев.  Шкулта ачасене тивӗçлӗ воспитани парас  ӗçре чылай чул ӗçлесе хисеплӗ ятсене тивӗçнӗ  педагогика ветеранӗсем Любовь Иванова, Зоя Алешева та поэзи каçӗ пирки лайăххине кăна каларӗç.

Ḉӗнтерӱçӗсене фонд ертӱçи Аслă Чемен ялӗн хисеплӗ гражданинӗ,  контактлă каратэ енӗпе Тӗнче чемпионӗ, педагогика наукисен кандидачӗ, Мускав çул-йӗр институчӗн Шупашкарти филиалӗн деканӗ Николай Алешев Хисеп хучӗсемпе парнесем парса хавхалантарчӗ.