Ылтӑн кӗркунне уявӗнче савӑнчӗҫ пурте!/Сител ялӗ/
Таврара ылтӑн кӗркунне хӑйӗн илемӗпе илӗртсе савӑнтарать. Ҫутҫанталӑк питӗ хитре, тӗрлӗ тӗспеле йӑлтӑртатса тӑрать. Кӗр Пики ятарласа сӑррине шеллемен. Пур ҫӗре те ҫитме тӑрӑшнӑ тейӗн. Ку илемлӗ тапхӑра нуммайӑшӗ кӑмӑллаҫҫӗ. Ҫакна шута илсе кӗркуннепе ҫывхарса килекен ашшӗсен уявне халалласа Пукрав кунӗнче Сителти культура ӗҫченӗсем "Ылтӑн кӗркунне ытамларӗ хӑнисене" ятпа уяв ирттерчӗҫ.
Мероприятине Ирина Лякова культорганизаторпа Оксана Хомуткина библиотекарь йӗркелерӗҫ. Вӗсем ертсе пынипех вӑл питӗ интереслӗ пулчӗ. Кӗр кунӗсене юратакансем кунта самайӑн пуҫтарӑнчӗҫ. Уява килме хапал тунисем кӗрхи вӑйӑсемпе конкурссенче хаваспах хутшӑнчӗҫ. Ҫавӑн пекех илемлӗ юрӑсем шӑрантарса савӑнчӗҫ. Уява йӗркелесе ертсе пыракансем ашшӗсене те тӗрлӗ тупӑшура ӑмӑрттарса хӑйсен пултаруллӑхӗпе паллаштарма, куракансене савӑнтарма майсем туса пачӗҫ. Мероприятинче пурте ҫулҫӑсен ташшине те чун каниччен ташласа киленчӗҫ.
Кӗркуннене халалланӑ кун тухӑҫлӑ иртрӗ. Пухӑннисене хаваслӑ кӑмӑл, ҫӗкленӳллӗ туйӑм парнелерӗ.
--